Leit að postulíni
Sýningin „Leit að postulíni" stendur yfir í Svavarssafni á Höfn í Hornafirði.
Á bak við sýninguna standa þau Brynhildur Pálsdóttir vöruhönnuður, Ólöf Erla Bjarnadóttir keramiker og Snæbjörn Guðmundsson jarðfræðingur en þau hafa unnið saman í yfir ár að verkefninu Leit að postulíni.
Verkefnið er í grunninn rannsókn á þeim möguleikum og hindrunum sem felast í nýtingu íslenskra jarðefna til að búa til postulín. Kveikjan að leitinni var saga postulíns, áhrif þessa sérstæða efnis á menningu okkar og hvernig það dreif áfram linnulausar tilraunir og tækniframfarir. Þessi þróun leiddi til gríðarmikillar útbreiðslu postulíns, sem er í dag órjúfanlegur hluti af okkar daglega lífi.
Tilraunir með leirvinnslu á Íslandi eru afar nýlegar miðað við flesta aðra stóra menningarheima, sem unnið hafa með leir í árþúsundir. Þegar vinnsla postulíns hófst í Danmörku á síðari hluta 18. aldar munaði þó ekki miklu að Ísland hefði fengið hlutverk í þeirri hröðu iðnþróun sem þá átti sér stað í Evrópu en ekkert varð úr því.
Í verkefninu skoða þau sögu postulíns og þann sess sem jarðefnin í kringum okkur skipa í menningu okkar og samfélagi. Við leiðum sjaldan hugann að því hvaðan efnin koma sem við teljum jafnvel sjálfsögð í okkar daglega lífi. Að baki efnunum liggur þó aldalöng þróun, eins konar framvinda í sambandi manns og náttúru, keyrð áfram af þrotlausri forvitni mannsins sem sífellt leitast við að umbreyta áður ónýtanlegum þáttum náttúrunnar.
Leit að postulíni er drifin áfram af þessari sömu forvitni og þrá eftir umbreytingu, þar sem við tökum efnin úr náttúrulega samhengi sínu og gefum þeim nýtt hlutverk. Er hægt að búa til postulínsbolla úr íslensku grjóti? Í verkefninu eru notuð jarðefni víðsvegar af landinu, t.d. Suðausturlandi en granít frá Slaufrudal í Lóni skipar mikilvægan sess í sýningunni.
Við sama tilefni opnar sýning í fremri sal á völdum keramíkmunum úr eigu Byggðarsafns Hornafjarðar.
Sýningin stendur til 15. janúar.