FYRIRLESTUR UM TÍMAMÓTAHÚS 7. ÁRATUGARINS Í GARÐABÆ

Þriðjudagskvöldið 25. október 2016, kl. 20.00, mun Pétur H. Ármannsson arkitekt endurflytja fyrirlestur um byggingarlist í Garðabæ í Hönnunarsafni Íslands, Garðatorgi.

Á 7. áratug 20. aldar risu í nýjum hverfum í Garðahreppi framúrstefnuleg einbýlishús sem þóttu og þykja enn tíðindum sæta í íslenskum arkitektúr. Með almennari bílaeign og aukinni velmegun eftir stríð varð vinsælt að byggja nýtískuleg einbýlishús í úthverfabyggðum utan marka borgarinnar og í návígi við ósnortna náttúru. Áhrif frá amerískum nútímaarkitektúr voru einkennandi á þessu tímabili. Nýjungar á borð við opin eldhús, arinveggi úr náttúrusteini, rennihurðir og samfellda gluggafleti frá gólfi til lofts urðu táknræn fyrir nútímalegan og heillandi lífsstíl. Mörg húsanna á Flötunum og í Arnarnesi voru teiknuð af helstu arkitektum þessa tímabils og sum eru í hópi þeirra kunnustu verka. Nýlega voru tvö hús í Garðabæ frá 7. áratugnum friðuð af Menntamálaráðherra sem tímamótaverk í íslenskri listasögu.

Í fyrirlestrinum fjallar Pétur H. Ármannsson arkitekt um þetta merka skeið í íslenskri byggingarlist 20. aldar í máli og myndum og setur í samhengi við sögu Garðabæjar og þróun byggðar á Höfuðborgarsvæðinu. Pétur lauk prófi í arkitektúr frá háskólanum í Toronto í Kanada árið 1986. Hann lauk meistaraprófi í arkitektúr frá Cornell-háskóla árið 1991. Hann hefur unnið sem arkitekt, sjálfstætt starfandi fræðimaður og sviðsstjóri hjá Minjastofnun Íslands ásamt því að hafa byggt upp og stýrt Byggingarlistadeild Listasafns Reykjavíkur um árabil. Pétur hefur ritað fjölda bóka og greina, fengist við kennslu og komið að gerð dagskrárefnis um íslenska byggingarlist.

Fyrirlesturinn er haldinn í tilefni af 40 ára afmæli Garðabæjar. Er um endurflutning að ræða, en fyrir 5 árum hélt Pétur sama erindi í Hönnunarsafninu og komust þá færri að en vildu.