Himneskir herskarar eru á facebook

Hugarflug, ráðstefna Listaháskóla Íslands um snertifleti listsköpunar og rannsókna fer fram dagana 16.-17. maí. Skólinn efnir nú í annað sinn til ráðstefnunnar, en hún mikilvægur liður í uppbyggingu listrannsókna við skólann og býður upp á tækifæri til umræðna, tengslamyndunar og almennrar miðlunar á þeim rannsóknum sem eiga sér stað á sviðinu.

Á Hugarflugi kynna tæplega 80 listamenn, hönnuðir, sjálfstætt starfandi fræðimenn, háskólakennarar og framhaldsnemar rannsóknarverkefni sín út frá heimspeki, arkitektúr, listkennslu, myndlist, safnafræði, leiklist, tónlist og listfræði. Rýnt er í efnistök, aðferðir, samstarf, miðla, kenningar eða niðurstöður verkefna sem ýmist eru í vinnslu eða er lokið.

Dagskrá ráðstefnunnar auk útdráttum erinda má nálgast á heimasíðu Listaháskólans

Dagskrá fimmtudagsins 16. maí
Dagskrá föstudagsins 17. maí

Í ráðstefnunefnd sátu Ólöf Gerður Sigfúsdóttir, Sigrún Alba Sigurðardóttir og Ásthildur Jónsdóttir.

Obevara brennsla, pappírspostulín, yfirborðsáferðir og grafísk tækni.

Leirlistakonurnar Anna K Jóhannsdóttir, Catherine Collart, Janice Hunter og Joan Grönfeldt Kristensen frá Danmörku verða með sýnikennslu og fyrirlestra á vinnustofu leirlistafélagsins að Korpúlfsstöðum, laugardaginn 1. júni frá kl. 12:00 – 16:30 - Obevarabrennsla - sýnikennsla í rakubrennslu með obevara tækni sem felst meðal annars í því að dýfa glóandi hlutum ofan í lög úr bjór og hveiti. - Pappírspostulín - sýnikennsla á tækni sem ein kvennanna hefur þróað til að búa til pappírspostulín. - Yfirborðsáferðir - fyrirlestur um yfirborðsáferðir og tækni við glerjun. - Grafísk tækni - sýnikennsla í grafískri tækni á leir. - Nordjyske keramikere - fyrirlestur um samtök keramikera á Norður- Jótlandi.   Þátttakendum býðst að koma með einn til tvo litla hluti í obevarabrennsluna. Hlutirnir þurfa að vera hrábrenndir og úr grófum leir, einnig þarf að vera auðvelt að grípa í þá með töng. Skrá þarf þátttöku fyrir 25. maí en einungis takmarkaður fjöldi kemst að. Þátttökugjald er 6.5oo kr. og greiðist inn á reikning 322-26-191919 kt: 190756-5729 Í hléi verður boðið upp á kaffi og meðlæti (innifalið í gjaldi) og tækifæri til að spjalla og skoða myndir frá Danmörku. Nánari upplýsingar veitir Guðný Hafsteinsdóttir í síma 699 2992 eða með tölvupósti gudnyhaf@simnet.is

Listasýningin Tölt opnar í Felleshus, sendiráði Norðurlandanna í Berlín þann 15. maí.

Sýningin er upphitun fyrir Heimsmeistaramót íslenska hestsins í Berlín í ágúst 2013 en um er að ræða listasýningu helgaða íslenska hestinum í gegnum ólík listform, eins og ljósmyndun, skúlptúr, myndbandsverk, hreyfimyndir, hönnun og tísku. Tölt stendur til 2. júlí 2013. 

Íslenski hesturinn ber á baki sér ríkulega menningararfleifð og er stór hluti þess hvernig Íslendingar skilgreina sig sem þjóð. Hesturinn er gegnheilt einkenni þjóðar- arfsins - hvort sem hann er í lausagöngu á hálendinu, taminn til að vinna verkin og bera okkur á bakinu eða fluttur á nýjan stað þar sem hann skeiðar í ókunnu umhverfi. Hesturinn þjónar einnig sem djúpstæð tenging við náttúru landsins og er óendanleg uppspretta andagiftar, sem brýst út í menningarsögu Íslands, skáldskap og samtímalist. 

Íslenskum samtímalistamönnum og hönnuðum hefur verið gefinn laus taumur til að skapa og sýna listaverk sem innblásin eru af íslenska hestinum; fegurð hans og þokka; litum og örlögum. Listamennirnir koma skynjun sinni og sýn, innblásinni af íslenska hestinum til skila með margvíslegu móti í mismunandi efnivið. 

Þátttakendur í sýningunni: Hrafnkell Birgisson, Gígja Einarsdóttir, Kristín S. Garðarsdóttir,  Ásta Guðmundsdóttir, Dögg Guðmundsdóttir, Una Lorenzen, Rut Sigurðardóttir, Spessi, Benni Valsson,  Andersen & Lauthm, Erna Einarsdóttir, Jör by Guðmundur Jörundsson og  Mundi.

Tekið verður ofan fyrir hinum þekkta listamanni Birgi Andréssyni (1955-2007), fulltrúa Íslands á Feneyjatvíæringnum árið 1995. Á sýningunni verða verk þar sem Birgir kannar tengsl sjónrænnar skynjunar og tungumálsins með munnlegum hestalýsingum. 

Sýningin er opin frá 16. maí til 2. júlí 2013 

Opnunartímar eru eftirfarandi: 
Mán. – föst. kl. 10-19
Lau.-sunn. kl. 11-16

Nánari upplýsingar má finna á heimasíðu Felleshus, hér.

Steinunn Marteinsdóttir  

Laugardaginn 11. maí kl 14.00 mun Steinunn Marteinsdóttir opna sýningu sína VÆTTIR OG VÆNTUMÞYKJUFÓLK í Listasal Mosfellsbæjar

Í kjölfar opnunarinnar í Listasalnum opnar Steinunn einnig sýningu kl. 15.00 á vinnustofu sinni að Hulduhólum.

Nokkur orð frá Steinunni:

Verið velkomin að sjá sýningu mína VÆTTIR OG VÆNTUMÞYKJUFÓLK sem opnuð verður laugardaginn 11. maí kl. 14 í Listasal Mosfellsbæjar og kl. 15 á Hulduhólum. Sýningin stendur til 7. júni í Listasal og til 8. júní á Hulduhólum.

Opið er í Listasal Mosfellsbæjar mánudaga til föstudaga kl 12-18 og á laugardögum frá kl 12-15. Lokað laugardaginn 8. júní

Opið er á Hulduhólum fimmtudaga til laugardaga kl 14-18
LOKAÐ Á SUNNUDÖGUM

Um Steinunni:

Eftir nám í myndlist við Myndlista- og handíðaskóla Íslands og við Hochschule für Bildende Künste í Berlín á árunum 1956-1960 vann Steinunn eitt ár hjá Ragnari Kjartansyni í Glit áður en hún stofnaði eigið keramikverkstæði, fyrst í Reykjavík. Frá 1969 hefur Steinunn búið og starfað að list sinni á Hulduhólum í Mosfellsbæ. Hún hefur fengist við leirlist og kennslu, og staðið fyrir sýningum í húsi sínu á eigin verkum og annarra. Á síðari árum hefur Steinunn æ meira fengist við málverk, án þess þó að leggja leirverkið alveg á hilluna, en hjá henni á sér ætíð stað samspil milli þessara greina myndlistar.

Steinunn hefur haldið á annan tug einkasýninga á Kjarvalsstöðum, í Listasal Mosfellsbæjar, Listasafni Reykjanesbæjar og víðar og tekið þátt í fjölda samsýninga á vegum opinberra aðila utanlands og innan. (Nánari upplýsingar eru á heimsíðunni www.hulduholar.com)

Í verkunum hefur Steinunn gjarnan horft til fjalla og fugla, mýra og móa en inn í söng og rúnir náttúrunnar hefur hún gjarnan ofið óræðu lífi vætta sem eru ef til vill ættaðar úr þjóðtrú og þjóðararfi. Í nýjustu verkunum gætir persónulegri stefja en áður. Þar vilja nú fá að birtast endurminningar sem bregða á sig blæ fjarlægðar og erfitt er að höndla, minningar um staði og stundir æskunnar, um kært fólk úr fortíð og nútíð. Eða eins og segir í kvæði Gríms Thomsens : „Svipþyrping sækir þing í
sinnis hljóðri borg“.

Sýningin „Blómabreiður Sissu“ hefur verið opnuð

á Skörinni, Aðalstræti 10, Reykjavík.

Verkin á sýningunni eru eftir Sissu (Sesselju Valtýsdóttur f. 1944) og þetta hennar fyrsta einkasýning. Sissa hefur um langt árabil fengist við handverk og hannyrðir og ræðst sjaldan á garðinn þar sem hann er lægstur. Fyrir nokkrum árum sá Sissa falleg teppi hjá systur sinni sem hún gerði úr bútum sem til féllu. Bútar þessir kölluðu á Sissu sem fékk þá í sínar hendur og hóf að sauma í þá blómamyndir og útbúa sinn eigin blómagarð. Upphaflega áttu bútarnir eingöngu að vera æfing en þar sem þetta var svo óendanlega gaman, urðu bútarnir tvisvar sinnum fjörtíu að tölu og enduðu sem tvær blómabreiður 200x130 cm að stærð sem nú verða sýndar á Skörinni.

Blómin eru öll saumuð fríhendis eins og Sissu finnst þau fallegust, en blómamyndir og teikningar hafðar til hliðsjónar. Blómabreiður Sissu eru frá upphafi hugsaðar sem fallegar ábreiður sem dætur hennar gætu yljað sér undir og notið þess að vera umvafðar blómum þar sem hvert spor er gert af ást og væntumþykju. Nú eru tvö teppi fullgerð og eitt eftir, þar sem dæturnar eru þrjár.
Einnig verða á sýningunni handbróderaðir púðar eftir Sissu.

Sýningin „Blómabreiður Sissu“ stendur til 22. maí og er opin alla virka daga kl. 9-18 og og 12-17 um helgar.

Brynja Davíðsdóttir hamskeri og náttúru- og umhverfisfræðingur flytur erindi um uppstoppun á síðasta Handverkskaffi vorsins. Sýnd verða skinn, efni og áhöld svo gestir geti glöggvað sig á faginu og vinnuferlinu.

Brynja Davíðsdóttir er lærður hamskeri, auk þess er hún náttúru- og umhverfisfræðingur frá Landbúnaðarháskóla Íslands. Þar þróaði hún aðferðir við vöktun mófugla í BS náminu.
Sem barn hafði Brynja mikinn áhuga á náttúrunni og sérstaklega fuglum en einnig er hún praktísk og útsjónasöm og hefur gaman að því að vinna með höndunum. Því sameinaði hún áhugasvið sín og styrkleika í einu fagi og hóf nám í hamskurði 18 ára gömul. Hún hélt til Bretlands með námsstyrk frá Menntamálaráðuneytinu og dvaldi þar árin 1994-1996. Hún lærði hjá ýmsum hamskerum með ólíka sérhæfingu og fékk á þann hátt yfirsýn yfir fagsviðið, mismunandi tækni og vinnubrögð í faginu.

Sjá nánar um Brynju á heimasíðu hennar www.hamskeri.is

Handverkskaffi í Gerðubergi hóf göngu sína haustið 2008. Handverkskaffi er haldið fyrsta miðvikudagskvöld hvers mánaðar. Markmiðið með þessum kvöldum er að bjóða upp á notalega kvöldstund þar sem gestir geta fengið sér kaffi og með því, spjallað og kynnst spennandi handverki. Boðið er upp á stuttar skemmtilegar kynningar og stundum sýnikennslu, allt eftir viðfangsefni kvöldsins.

 
Ókeypis aðgangur

www.gerduberg.is

Útskriftarsýning nemenda í "Mótun: Leir og Tengd efni" við Myndlistaskólann í Reykjavík

Að borða saman og deila mat með öðrum tengir fólk saman á mjög náinn hátt og er grunnstoð flestra samfélaga heimsins. Matur gefur okkur orku og er okkur lífsnauðsynlegur en í honum birtast einnig hefðir og siðir mismunandi landa. Maturinn getur því kallað fram ýmsar tilfinningar, t.d. nostalgíu og skapað umræður og jafnvel stýrt félagslegri hegðun fólks.

Á vorönninni unnu nemendur að rannsóknum á matarmenningu og hönnun borðbúnaðar í postulín til að bera fram ýmiss konar mat til að deila með fólki í samkvæmum.

Verkefnið var unnið í samstarfi við finnska hönnunarfyrirtækið Tonfisk Design.

Leiðbeinendur: Ólöf Erla Bjarnadóttir og Þórunn Árnadóttir 

Sýningin er opin frá 4. til 12.maí.

Arnþrúður Ösp Karlsdóttir opnar sýningu  á prjónhönnun, skotthúfum og lambhúshettum í Herberginu, Kirsuberjatrénu Vesturgötu 4, 101 Reykjavík miðvikudaginn 1. maí kl 15-17.

Verið velkomin!

Sýningin stendur til 13. maí 2013.

Kirsuberjatréð er opið virka daga kl. 11-18, laugardaga kl. 11-17 en lokað sunnudaga.

Ingiríður Óðinsdóttir

Sigurborg Stefánsdóttir

Þann 6. apríl 2013 opnaði sýningin: hem : HJEM : koti : heim : heima : angerlarsimaffik í Silkeborg Bad á Jótlandi. Þrjátíu og þrír norrænir listamenn sýna þar bókverk undir þemanu: heima, heimili eða heimkynni. Níu ARKIR eiga verk á sýningunni, sem er skipulögð af forkólfum CONTEXT-hópsins í Danmörku. Fylgjast má með framvindu sýningarinnar á heimasíðu CONTEXT-hópsins, sem og opinni FBsíðu hópsins. Sýningin heldur í ferðalag um Norðurlönd og er væntanleg til Íslands í byrjun næsta árs.

Listamenn sem eiga verk á sýningunni:

Anna Lindgren, Anna Snædís Sigmarsdóttir, Anne Bjørn, Arnannguaq Høegh,  Arnþrúður Ösp Karlsdóttir, Áslaug Jónsdottir, Bente Elisabeth Endresen, Beinta av Reyni, Bodil Rosenberg,  Bryndis Bragadóttir, Dorthe Bøtker, Erika Tysse, Giuli/Gulla R. Larsen, Gunilla Åsberg, Göta Friedeborg Svensson, Hanne Matthiesen, Helga Pálina Brynjólfsdottir, Ingiríður Óðinsdóttir, Jessie Kleemann, Joe Ingvartsen, Jóhanna Margrét Tryggvadóttir, Juha Juro, Julia Pars, Lis Rejnert Jensen, Marianne Laimer, Pia Fonnesbech, Raija Jokinen, Rita Marhaug,  Sigurborg Stefánsdóttir, Susanne Helweg, Svanborg Matthíasdóttir, Synnöve Dickhoff og Tina Gjerulff.

Laugardaginn 27. apríl kl. 14.30 opnar sýningin Lista án landamæra í sýningarsalnum Deiglunni sem staðsett er í Listagilinu á Akureyri.

Á sýningunni, sem hópurinn Geðlist stendur fyrir, verður boðið upp á ljóðlist, stólahönnun, útskurð, málverk og margt fleira.
List án landamæra er listahátíð fjölbreytileikans, árlegur viðburður sem miðar að því að kynna verk fólks með fötlun og koma á samstarfi milli fatlaðs og ófatlaðs listafólks. Áhersla hátíðarinnar er á sýnileika ólíkra einstaklinga og frjóa samvinnu. Sýnileiki hefur enda bein áhrif á jafnrétti á öllum sviðum. List án landamæra er hátíð þess mögulega, hátíð margbreytni og tækifæra fyrir alla í því góða samfélagi sem við byggjum.  Fjölmargir hæfileikaríkir listamenn taka þátt í hátíðarhöldunum og á undanförnum árum hefur hún þróast í skemmtilegar áttir. Æ fleiri eru nú meðvitaðir um gildi hennar í listalífinu, bæði þátttakendur og gestir.

Sýningin stendur til 12. maí og er opin alla daga nema mánudaga og þriðjudaga kl. 14-17. Aðgangur er ókeypis.

Leiðsögn um sýninguna sunnudaginn 28. apríl kl. 15.00

Sýning í Menningarmiðstöðinni Gerðubergi.

Fuglar í öllum mögulegum birtingarmyndum, eftir á fjórða tug listamanna, eru efni þessarar stóru samsýningar sem sett er upp í fjórum af fimm sýningarrýmum Gerðubergs.

Sýningarstjóri er Þórunn E. Sveinsdóttir.

Til sýnis eru fuglar eins og maðurinn sér þá; fiðraðir, tálgaðir, teiknaðir, uppstoppaðir, glerjaðir, málaðir, myndaðir, mótaðir og talaðir á flug. Fuglar á ljósmynd og fuglar í lifandi mynd. Við undirbúning sýningarinnar var leitað til fjölmargra listamanna og eigenda verka sem tengjast fuglum á einn eða annan hátt. Í því ferli hefur verið sérstaklega ánægjulegt að komast að því hvað fuglar hafa skipað stóran sess í huga margra listamanna allt frá barnæsku og að hvað fuglar eiga fallegt pláss í vitund allra landsmanna. Listamennirnir sem taka þátt í sýningunni eiga allir sinn fugl og sína nálgun á hann. 

Listamenn:
Aðalheiður Eysteinsdóttir, Benedikt Gröndal, Birgir Andrésson, Bjarni Massi, Björn Björnsson, Björn Ingvarsson, Bragi Ásgeirsson, Brynhildur Þorgeirsdóttir, Brynja Davíðsdóttir, Finnbogi Pétursson, Frosti Friðriksson, Guðmundur frá Miðdal, Guðmundur Páll Ólafsson, Hafþór Ragnar Þórhallsson, Helgi Þorgils Friðjónsson, Helgi Þórsson, Hulda Hákon, Ilmur Stefánsdóttir, Ísleifur Jónsson, Jarþrúður Karlsdóttir, Jón Baldur Hlíðberg, Jón Karlsson, Jón Óskar,  Kristín Þóra Guðbjartsdóttir, Magnús Kjartansson, Magnús Pálsson, Ómar Óskarsson, Páll Steingrímsson, Pétur Magnússon, Sara Gunnarsdóttir, Sara Riel, Signý Kolbeinsdóttir, Steingrímur Eyfjörð, Svana Lovísa Kristjánsdóttir,  Svava Björnsdóttir, Tumi Magnússon, Vera Sölvadóttir, Þórarinn Eldjárn, Þórdís Alda Sigurðardóttir. 

Sjá nánar á www.gerduberg.is

Þriðjudaginn 30. apríl kl. 12:10 halda Victorina Rodionova & Anna Kholina erindi "On Digital Design / Photography & PRACTICE-LED RESEARCH" í fyrirlestrarröð hönnunar - og arkitektúrdeildar Listaháskóla Íslands, GESTAGANGI í Þverholti 11, fyrirlestrarsal A.

Þær koma frá hönnunardeild Saint-Petersburg State Polytechnical University í Rússlandi og eru gestakennarar við Hönnunar- og arkítektúrdeild LHÍ.

Fyrirlesturinn fer fram á ensku og eru allir velkomnir.

Á sýningunni sýna 76 útskriftarnemendur mynd-listardeildar og hönnunar- og arkitektúrdeildar afrakstur þriggja ára náms við Listaháskólann þar sem markmiðið hefur verið að skapa nemendum aðstöðu til að mennta sig sem listamenn og gera þá reiðubúna til að takast á við víðtæk viðfangsefni á skapandi og gagnrýninn hátt  með forvitni, áræði og framsækni að leiðarljósi.

Sýningastjóra spjall:
Sunnudaginn 28. apríl kl. 15:00
Myndlist, fatahönnun og arkitektúr

Sunnudaginn 5. maí kl. 15:00
Vöruhönnun og grafísk hönnun

Sýningin stendur til 5. maí og er opin daglega á opnunartíma safnsins, frá kl. 10:00- 17:00 og á fimmtudögum frá kl. 10:00- 20:00.

Aðgangur er ókeypis og allir velkomnir