Ragna Fróðadóttir, hönnuður og listrænn stjórnandi hjá Edelkoort inc. mun halda fyrirlestur í Norræna húsinu 11.febrúar n.k.  kl. 14.00. Um er að ræða svokallað trend forecast sem fyrirtækið Edelkoort  er heimsþekkt fyrir. Í fyrirlestri sínum mun Ragna leggja áherslu á áhrif þjóðarmenningar á strauma og stefnur í hönnun.

Ragna Fróðadóttir nam textíl- og tískuhönnun  í París og Reykjavík. Eftir að hafa haldið úti eigin fatahönn-unarmerki, Path of Love, í um áratug flutti hún til New York og hóf störf hjá alþjóðlega fyrirtækinu Edelkoort inc. Ragna Fróðadóttir tók þátt í Norræna tísku-tvíæringnum 2011 í Seattle.

Lengd: 90 mínútur - Miðaverð: 2000 kr.

Nánari upplýsingar: nh@nordice.is

http://ragnafroda.com/

Frá sýningunni í nóvember 2011

Undanfarin sex ár hefur HANDVERK OG HÖNNUN staðið fyrir sýningu á haustin í Ráðhúsi Reykjavíkur. Þar hafa í hvert sinn u.þ.b. 60 aðilar sýnt og kynnt mjög fjölbreytt íslenskt handverk, listiðnað og hönnun. Það er óhætt að segja að sýningunni hafi verið vel tekið og hefur aðsóknin alltaf verið mjög mikil.

Vegna mikillar eftirspurnar, bæði frá gestum og þátttakendum, hefur verið ákveðið að halda tvær slíkar sýningar í ár. Sú fyrri verður dagana 3. til 7. maí og sú síðari 1. til 5. nóvember.

Í næstu viku verður umsóknareyðublað og kynning vegna sýningarinnar í maí sett inn á heimasíðuna.

í Gerðubergi 4. febrúar – 1. apríl 2012

Páll Guðmundsson á Húsafelli sýnir úrval verka sinna af hellu-, svell- og bergþrykki og verk úr steini. Sýningin er tileinkuð minningu Thors Vilhjálmssonar.
Við opnun sýningarinnar, laugardaginn 4. febrúar kl. 14, flytja þeir félagar Páll, Steindór Andersen og Hilmar Örn Hilmarsson nokkur lög á steinhörpu Páls.

Páll Guðmundsson er fæddur árið 1959 á Húsafelli í Borgarfirði þar sem hann ólst upp. Hann er eitt fjögurra barna Guðmundar Pálssonar bónda á Húsafelli, sem nú er látinn og Ástríðar Þorsteinsdóttur húsfreyju.

Eftir grunnskólanám á Kleppjárnsreykjum stundaði Páll nám við Myndlista- og handíðaskóla Íslands árin 1977-1981 og árið 1985-1986 við Listaháskólann í Köln í Vestur-Þýskalandi en þar var lærifaðir hans prófessor Burgeff.

Eftir að hann lauk námi hefur hann óskiptur helgað sig listamannsstarfinu. Lengst af dvelur hann á Húsafelli, en hefur þó ferðast víða og unnið ýmis sérverkefni fyrir fyrirtæki, stofnanir og sveitarfélög hér heima og erlendis.
Hann hefur haldið fjölda sýninga á verkum sínum; bæði einkasýningar og samsýningar. Páll hefur verið óhræddur við að fara ótroðnar slóðir í myndlistinni. Allt frá því að mála með olíulitum og vatnslitum, hefur hann höggvið myndverk í grjót úr Bæjargilinu heima á Húsafelli, gert helluþrykk, bergþrykk og svellþrykk auk þess sem hann býr til sína eigin steinliti til myndgerðar.

Síðustu árin hefur Páll lagt mikla vinnu í gerð ýmissa steinharpa og var tónverk eftir Áskel Másson „Steinabragur” fyrir steinhörpu frumflutt á sýningu Páls í Ásmundarsafni árið 2001.  Páll hefur unnið með mörgum þjóðþekktum tónlistarmönnum og má þar nefna samstarf hans við Sigurrós á flutningi Hrafnagaldurs en þar lék steinharpa Páls stórt hlutverk.

Undanfarin ár hefur Páll verið náinn samstarfsmaður Thors heitins Vilhjálmssonar rithöfundar. Saman hafa þeir skapað verk þar sem hæfileikar þeirra beggja njóta sín í ystu æsar og hefur Thor ort kvæði sem innblásin voru af myndum Páls. 

Sjá nánar um Pál á www.pallg.is

ÍSAK ÓLI

Laugardaginn 4. febrúar kl. 16.00 opnar Ísak Óli málverkasýningu í húnoghún, Skólavörðustíg 17b.

Ísak Óli er einhverfur ungur maður með mikla listræna hæfileika.

Sýningin stendur út febrúar.

Afmælismálþing myndhöggvarafélagsins

Hafnarhús, laugardaginn 4. febrúar kl. 13-16

Myndhöggvarafélag Reykjavíkur fagnar 40 ára afmæli í ágúst á þessu ári en af því tilefni efnir félagið, í samvinnu við Listasafn Reykjavíkur, til opins málþings í Listasafni Reykjavíkur - Hafnarhúsi laugardaginn 4. feb. kl. 13-16 um list í almenningsrými. Á afmælisárinu mun Myndhöggvarafélagið standa fyrir veglegri menningardagskrá, m.a. myndlistarsýningu félagsmanna, sýningu um útisýningarnar á Skólavörðuholtinu og bókaútgáfu.

Í afmælisdagskrá félagsins er sjónum beint að list í almenningsrými, en á málþinginu er fjallað um stöðu og þróun listar í almenningsrými í víðtækara samhengi en þegar rætt er um hefðbundin útilistaverk á opinberum vettvangi. List í almenningsrými getur ýmist varað tímabundið eða verið ákveðið inngrip í umhverfið. Almenningsrými bíður upp á möguleika til rannsóknar á félagslegum og/eða sögulegum raunveruleika sem listamenn hafa nýtt með ólíkum aðferðum.

DAGSKRÁ

Æsa Sigurjónsdóttir, listræðingur - Staður, ljós og minni. List í almannarými í reykvísku samhengi.
Ólafur S. Gíslason, myndlistarmaður – Samfélagslegt rými.
Hlé
Sara Riel myndlistarmaður – Streetart/Strætislist: Saga, þróun og listafólkið.
Fyrirspurnir og umræður í pallborði. Þátttakendur eru:
Brynhildur Þorgeirsdóttir, myndlistarmaður
Hrólfur Jónsson sviðsstjóri framkvæmda- og eignasviðs Reykjavíkur
Ólafur S. Gíslason, myndlistarmaður
Sara Riel, myndlistarmaður
Æsa Sigurjónsdóttir, listræðingur

Stjórnandi málþingsins er Dagný Guðmundsdóttir, myndlistarmaður og meðlimur í stjórn Myndhöggvarafélagsins.

Málþingið er öllum opið án endurgjalds

---

Leiðsögn

Ásmundarsafn, sunnudaginn 5. febrúar kl. 14.

Næstkomandi sunnudag verður boðið upp á leiðsögn með áherslu á útilistaverk Ásmundar Sveinssonar og verk í opinberu rými. Kristín Dagmar Jóhannesdóttir, listfræðingur og verkefnastjóri dagskrár hjá Listasafni Reykjavíkur segir frá verkum Ásmundar og hugmyndum hans um mikilvægi þess að listin sé hluti af daglegu umhverfi fólks.

Ásmundur stundaði nám við Sænsku listaka-demíuna undir handleiðslu myndhöggvarans Carls Milles. Þar kynntist hann þeirri hugmynd, sem hann aðhylltist æ síðan að höggmyndalistin væri hluti af landslagi borgarinnar. Ásmundur boðaði líka að listin ætti erindi við fólkið í landinu og ætti heima á meðal þess. Hann var kallaður alþýðuskáldið í myndlist sem má rekja til lífsafstöðu hans ekki síður en höggmyndahefðarinnar. Flest verk sín hugsaði hann sem hluta af opinberu rými, órofa hluta af umhverfi sínu eða þá að hann útfærði þau sem hönnunar- og nytjahlut.

Umhverfis Ásmundarsafn er höggmyndagarður og prýða hann nær þrjátíu höggmyndir listamannsins en gengið verður um garðinn ef veður leyfir.

Sjá nánar á www.listasafnreykjavikur.is

Í Gerðarsafni 21.01 - 29.02 2012

Leiðsögn sunnudaginn 5. febrúar kl. 15:00

Helgi Hjaltalín Eyjólfsson sýningarstjóri og myndlistarmaður, verður með leiðsögn um sýninguna sunnudaginn 5. febrúar kl. 15:00.

Sýningin Sæborgin: Kynjaverur og ókindur. Þema sýningarinnar byggir á nýútkominni bók Úlfhildar Dagsdóttur bókmenntafræðings, „Sæborgin: Stefnumót líkama og tækni í ævintýri og veruleika“. Bókin fjallar um þá ímynd er tæknimenning og líftækni taka á sig í vitund almennings. Þema sýningarinnar eru sæborgir í íslenskri myndlist, eins og þær birtast í meðförum 21 íslenskra myndlistarmanna. Þeir eru: Anna Hallin, Birgir Snæbjörn Birgisson, Bjarni Hinriksson, Davíð Örn Halldórsson, Erró, Finnbogi Pétursson, Gabríela Friðriksdóttir, Guðrún Vera Hjartardóttir, Helga Þórsdóttir,  Hugleikur Dagsson, Inga María Brynjarsdóttir, Jóhann Ludwig Torfason, Jón Gunnar Árnason, Markmið, Olga Bergmann, Ólöf Nordal, Páll Thayer, Sara Björnsdóttir, Sigurður Örlygsson, Valgerður Guðlaugsdóttir.

Í stuttu máli endurspegla verkin á sýningunni hrifningu okkar og ótta við vélina og nærveru hennar í menningu nútímans. Í þeim getur meðal annars að líta kynjaverur og ókindur orðnar til við samruna ólífrænna og lífrænna efna, verur sem eru í senn lifandi og vélrænar.

Á sýningunni eru einnig myndbönd Bjarkar Guðmundsdóttur, gripir og bækur frá versluninni Nexus, Star Wars leikföng, ljósmyndir og myndbönd frá CCP auk stoðtækja frá Össuri.

Sýningarstjórar Helgi Hjaltalín Eyjólfsson myndlistarmaður og Úlfhildur Dagsdóttir.

Upplýsingar um viðburði á meðan sýningu stendur sjá www.gerdarsafn.isog facebook síðu safnsins.

Sýningin stendur til 29. febrúar og er opin frá 11-17 alla virka daga nema mánudaga.

Aðgangseyrir 500 kr. Ókeypis á miðvikudögum.

Hádegisfyrirlestur í myndlistardeild mánudaginn 6. febrúar kl.12.30 í Listaháskóla Íslands, Laugarnesvegi 91, Reykjavík í fyrirlestrarröðinni VINNUSTOFAN.

Jón Proppé fjallar um sýningarstjórnun og skrif um myndlist og reynir að miðla fræðandi og skemmtilegum molum af löngum ferli sínum við allskonar stúss kringum myndlist og kenningar.

Myndin sýnir Jón við hlið styttu Aðalheiðar S. Eysteinsdóttur af Magnúsi Pálssyni.

Jón Proppé (fæddur 1962) er heimspekingur en hefur aðallega fjallað um myndlist síðustu tvo til þrjá áratugi. Eftir hann liggur á fimmta hundrað greina, bókarkafla, sýningarskráa og bóka, og hann er einn af höfundum Íslenskrar listasögu sem út kom í fyrra. Hann hefur líka stýrt og sett upp tugi sýninga á Íslandi og hingað og þangað í útlöndum. Í fyrirlestrinum mun hann fjalla á opinskáan hátt um reynslu sína af sýningarstjórnun og leitast við að draga af henni lærdóm, vara við hættum og gefa góð ráð.

Vinnustofan er íverustaður stöðugrar gerjunar, ígrundunar, tilviljanna, mistaka og úrvinnslu. Á vormisseri munu ólíkir myndlistarmenn leiða viðstadda í gegnum samtal hugar og handa, vinnuferli og aðferðir, í fullvissu jafnt sem efa. Allir eiga þeir sér sína vinnustofu, hvort sem hún er aðgreint rými sem slík ellegar horn á stofuborði, vinnustofa flakkarans sem gerir alla staði og engan að sínum eða skissubók í hendi.

Fyrirlestrarnir eru öllum opnir og hefjast klukkan 12:30 í húsnæði Myndlistardeildar Listaháskóla Íslands að Laugarnesvegi 91 í Reykjavík.

Sjá nánar hér

Opnað hefur verið fyrir skráningar í dagskrá HönnunarMars

sem fram fer dagana 22. - 25. mars 2012.

Aðildarfélög Hönnunarmiðstöðvar vinna nú að dagskrá sinni og mörg þeirra standa fyrir samsýningu félagsmanna sinna.

Undirbúningshópurinn hvetur hönnuði í fagfélögum Hönnunarmiðstöðvar sem hyggjast taka þátt í dagskránni, að setja sig í samband við verkefnisstjóra viðkomandi félags. Aðrir þátttakendur geta skráð viðburð sinn skv. upplýsingum hér að neðan.

Frestur til að skrá viðburði rennur út miðvikudaginn 15. febrúar nk.

Skráning:

Þú hleður niður skráningareyðublaði sem þú finnur á vef Hönnunarmiðstöðvar. Vistaðu því næst skjalið með nafni viðburðarins, fylltu vandlega út í alla reyti og sendu á verkefnisstjóra fagfélagsins þíns. Ef þú ert ekki meðlimur í einum af fagfélögum Hönnunarmiðstöðvar sendu þá skráninguna á info@honnunarmidstod.is.

Athygli skal vakin á því að skráningar þeirra sem ekki eru í fagfélögum Hönnunarmiðstöðvar verða teknar sérstaklega fyrir í stjórn HönnunarMars, sem áskilur sér rétt að hafna skráningunum uppfylli þær ekki kröfur um þátttöku.

HönnunarMars hefur stimplað sig rækilega inn, bæði meðal hönnuða en líka í borginni allri. Hann boðar vorkomuna og um leið gróskuna í íslenskri hönnun. Þar sem vel hefur tekist til verður haldið áfram á sömu braut en samhliða kynntar nýjungar í dagskrá.

Þverfagleg samvinna milli greina og út fyrir svið hönnunar verður í brennidepli á HönnunarMars í ár, þar sem leiðandi hönnuðir í heiminum í dag taka þátt í sérstakri dagskrá fyrir hönnuði, atvinnulíf og almenning.

Skoða vef Hönnunarmiðstöðvar

TÍZKA - Kjólar og korselett

Á sýningunni eru svokallaðir módelkjólar sem saumaðir voru eftir pöntun og ýmsir fylgihlutir eins og skór, hattar, hanskar og undirföt. Kjólarnir eru listaverk, sumir látlausir og einfaldir aðrir tilkomumiklir og glæsilegir, kjólar sem pössuðu við konuna og tilefnið. Sýningarhöfundur er Steinunn Sigurðardóttir fatahönnuður, en með einstakri innsýn sinni í tískustrauma 20. aldar tekst henni að glæða kjólana á sýningunni nýju lífi.

Kjólarnir koma úr safni Þjóðminjasafnsins og frá einkaaðilum. Söfnun 20. aldar klæðnaðar hefur verið stunduð um hríð í safninu og þá sérstaklega með áherslu á íslenskt handverk og framleiðslu. Þeir kjólar sem koma frá einkaaðilum voru valdir til að sýna annars vegar tískustraumana og handverkið og hins vegar einstaklingana sem gengu í kjólunum, því módelkjóllinn er ekki fullburða listaverk fyrr en rétta konan er komin í hann.

Kjólarnir á sýningunni endurspegla tískustrauma tímabilsins og sýna svo ekki verður um villst að íslenskar konur voru í takti við það sem gerðist í París, London og New York. Á síðum íslensku blaðanna var ávallt fjallað um tískuna og tískustraumar kynntir vor og haust. En það voru ekki allir á eitt sáttir um tískuna þá frekar en nú. Kvenímynd 6. áratugarins krafðist þess að líkaminn væri mótaður til hins ítrasta og mittið átti að vera þvengmjótt. Korselettið var þá kynnt sem hluti af grunnfataskáp hverrar konu og fjallað var um mikilvægi góðra undirfata í tískutímaritum.

Sýningin er í Bogasal Þjóðminjasafnsins og stendur frá  28. janúar- 28. ágúst 2012

Sjá nánar á á vef Þjóðminjasafnsins

Handaverk frú Magneu Þorkelsdóttur

Magnea Þorkelsdóttir biskupsfrú var mikil hannyrðakona og urðu mörg listaverk til í höndum hennar. Hún saumaði fjölda þjóðbúninga bæði á sig og afkomendur sína. Á sýningunni verða valdir búningar úr safni fjölskyldunnar.
Magnea fæddist 1. mars 1911 í Reykjavík. Þegar Magnea var á barnsaldri kynntist hún nágrannakonu sinni en af henni nam hún fyrstu nálarsporin aðeins fimm ára að aldri. Magnea gekk í Miðbæjarskólann og síðan í Kvennaskólann í Reykjavík. Hún var afburðanemandi og hlaut verðlaun við útskrift bæði fyrir verkkunnáttu og bóklegar greinar. Hæfileikar hennar nýttust er hún réðst ung stúlka til vinnu á saumastofunni Dyngju í Reykjavík. Þar vann hún við að baldera og sauma þjóðbúninga m.a. skautbúninga fyrir Alþingishátíðina 1930. Þótt Magnea hafi verið jafnvíg á bóknám og verknám stóð hugur hennar alltaf til hannyrða sem hún vann af ástríðu og einstöku listfengi alla tíð.
Þann 22. ágúst 1933 giftist hún Sigurbirni Einarssyni síðar biskupi. Þau hjónin eignuðust átta börn saman. Magnea tók alla tíð virkan þátt í starfi eiginmanns síns fyrst á Breiðabólsstað á Skógarströnd og síðar í hinni nýju Hallgrímssókn í Reykjavík. Á Breiðabólsstað reyndi fyrst á hlutskipti Magneu sem prestsfrúar. Við frumstæð skilyrði án rennandi vatns með ört stækkandi barnahóp framreiddi hún messukaffi eftir hverja guðsþjónustu. Þar var einnig gestkvæmt því símstöð sveitarinnar var á prestssetrinu. Þá var Magnea organisti á Breiðabólsstað.
Annríkið á heimilinu varð ekki minna eftir að fjölskyldan flutti suður. Á heimilinu var jafnframt skrifstofa Sigurbjörns þar sem hann tók á móti sóknarbörnum og sinnti ritstörfum. Þó að Sigurbjörn tæki við háskólakennslu 1944 vann hann oft prestsverk og í stofunni smáu fóru fram brúðkaup og skírnir þar sem Magnea spilaði undir á orgel og síðar píanó því engin var kirkja þessa unga safnaðar. Með hannyrðum sínum lagði hún kirkjubyggingu Hallgrímssafnaðar lið og gaf útsaumaða dúka sína árum saman á kirkjubasar í fjáröflunarskyni.

Samhliða sýningunni kemur út bók með sýnishornum af þeirri fjölbreyttu handavinnu sem Magnea saumaði sér og afkomendum sínum.

Sýningin er á 3 hæð Þjóðminjasafnsins og stendur frá  28. janúar- 28. ágúst 2012

Sjá nánar á á vef Þjóðminjasafnsins

Adobe Photoshop - Myndvinnsla

Adobe Illustrator – Mynsturgerð

Textílverkstæðið Korpa

Námskeið I

Adobe Photoshop - Myndvinnsla

Laugardaginn  11. febrúar kl: 10:00 – 17:00.

Námskeið II

Adobe Illustrator – Mynsturgerð

Laugardaginn 25. febrúar kl: 10:00 – 17:00.

Fjöldi: 6-8 þátttakendur á námskeið

Verð: 15.000.-

Upplýsingar gefur Kristveig Halldórsdóttir,  kristveig@islandia.is

Breska myndlistarkonan Olivia Plender fjallar um verk sín og vinnuaðferðir í fyrirlestraröðinni Vinnustofan við myndlistardeild Listaháskóla Íslands.

Fyrirlesturinn er öllum opnir og hefst kl. 12:30 í húsnæði deildarinnar að Laugarnesvegi 91 í Reykjavík. Fyrirlesturinn fer fram á ensku.

Olivia Plender (fædd 1977) býr og starfar í Berlín. Hún mun fjalla um myndlist sína og vinnuaðferðir sem eru rannsóknarmiðaðar. Í umfangsmiklum verkefnum hefur hún tekist á við hugmyndafræðileg viðfangsefni sem tengjast sögulegum málefnum, upp á síðkastið málefni sem fjalla um breytingar er varða menntun og samfélagsleg gildi.

Olivia Plender hefur sýnt alþjóðlega, m.a. á sýningunum the British Art Show 10, Hayward Gallery, London (2011); Taipei Biennial, Taipei, Taiwan (2010); Aadieu, Adieu Apa (Goodbye Goodbye Father), Gasworks Gallery (2009); Altermodern: Tate Triennial 2009, Tate Britain; Bucharest Biennial, Bucharest, Romania; The Greenroom, Hessel Museum of Art, CCS Bard, New York, (2008); The Great Transformation, Frankfurter Kunstverein, Frankfurt (2008); Information, Education, Entertainment, Marabou Parken Annex, Stockholm (2007); Tate Triennial, Tate Britain, London (2006); Busan Biennial, Busan, South Korea (2006); BMW: 1X Baltic Triennial of International Art, CAC, Vilnius (2005); Romantic Detachment, PS1/ MoMA, New York (2004).

Vinnustofan er íverustaður stöðugrar gerjunar, ígrundunar, tilviljanna, mistaka og úrvinnslu. Á vormisseri munu ólíkir myndlistarmenn leiða viðstadda í gegnum samtal hugar og handa, vinnuferli og aðferðir, í fullvissu jafnt sem efa. Allir eiga þeir sér sína vinnustofu, hvort sem hún er aðgreint rými sem slík ellegar horn á stofuborði, vinnustofa flakkarans sem gerir alla staði og engan að sínum eða skissubók í hendi.

Textiles, Women and Cloth in Iceland, AD 874-1800

Þriðjudaginn 31. jan. kl. 12:05 mun Michèle Hayeur Smith frá Haffenreffer safninu við Brown háskóla í Bandaríkunum halda hádegisfyrirlestur í Þjóðminjasafni Íslands um textíl, konur og fatnað á Íslandi á árunum 874 1800.

Fyrirlesturinn er hluti af fyrirlestraröðinni „Fræðslufyrirlestrar Þjóðminjasafnsins“.
Fyrirlesturinn er haldinn á ensku. Aðgangur er ókeypis og allir velkomnir.

Ólíkt því sem þekkist víðast hvar í heiminum hefur mikið og fjölbreytt safn forna textíla varðveist á Íslandi. Þótt lítið sé búið að rannsaka þá enn, þá innihalda þeir mikilvægar upplýsingar um Ísland fyrr á öldum og þá sérstaklega um hvaða hlutverk konur léku í hefðbundnu íslensku samfélagi og efnahagskerfi. Í erindinu verða kynntar fyrstu niðurstöður rannsóknar sem stendur yfir á íslenskri vefnaðarvöru útfrá málefnum kynjanna, vefnaðartækni, viðskiptum og klæðnaði allt frá landnámi  og fram á 19. öld.

Michèle Hayeur Smith er fornleifafræðingur og hefur unnið að rannsóknum á Íslandi og í Norður-Ameríku. Rannsóknir hennar hafa helst fjallað um efnismenningu, fatnað, líkamann og kynjamyndir. Hún hefur rannsakað skartgripi úr íslenskum kumlum og hvað megi lesa úr þeim varðandi stétt, stöðu og menningarlega sjálfsmynd fornmanna. Nýlegar rannsóknir Michèle snúa að framleiðslu og dreifingu vefnaðar á Íslandi frá landnámi til 19. aldar og munu vonandi varpa ljósi á áhrif kvenna á íslenskan efnahag, heimilishald, stjórnmál og menningu í aldanna rás.

Guðný Guðmundsdóttir
Sýningin í kaffihúsi Gerðubergs 22. janúar - 11. apríl 2012

Guðný Guðmundsdóttir leyfir okkur að skyggnast inn í ólíka heima með litríkum klippimyndum sínum í kaffihúsi Gerðubergs.

Á opnun sýningarinnar, sunnudaginn 22. janúar kl. 14, verður Guðný með þuludagskrá þar sem hún fer með óþekktar og gamlar þulur.

Guðný er vel þekkt fyrir rekstur sinn á búðinni Græna Línan sem var til margra ára á Laugaveginum. Þar starfaði hún sem heilsuráðgjafi og seldi húð- og heilsuvörur. Brennandi áhugi Guðnýjar er þó enn til staðar þegar kemur að heilsu og sinnir hún enn ráðgjöf og hefur umboð fyrir húðvörur sem hún selur heima. 

Guðný byrjaði fyrir nokkrum árum að klippa myndir úr tímaritum, raða þeim saman og skapa töfrandi myndheima. Hún fann að þetta listform sem opnaðist fyrir henni væri ákveðin þerapía (heilun) og hugleiðsla. 

Guðný leggur mikinn metnað í úrklippurnar og að baki hverrar myndar liggur mikil vinna. Hún raðar úrklippunum eftir litatónum og fær þannig innblástur. Þannig veljast úrklippurnar í verkið sem smátt og smátt skapa heildstætt verk. Í hverri mynd er ákveðið þema en það er sameiginlegt með öllum verkum hennar að mannslíkamanum er ekki flíkað eins og gjarnan er gert í auglýsingum. 

Vinnan við gerð myndanna er orðin stór þáttur í lífi Guðnýjar og segir hún að í hverju verki sé sál hennar og líf. 

Sýningin er opin virka daga kl. 10 - 16 og um helgar kl. 13 - 16.

Anna María Lind Geirsdóttir hefur opnað sýninguna „Bómullartuskur“ 

í sal Íslenskrar grafíkur Tryggvagötu 17, hafnarmegin.

Sýningin stendur til 5. febrúar og er opið fimmtudaga – sunnudaga kl. 13-18.

Fótgangandi og hjólandi gestir sérlega velkomnir

Sunnudaginn 29. janúar kl. 15 verður listamannaspjall.

Sýningin er unnin í samvinnu við listafræðinginn Deborah Kraak frá Bandaríkjunum. Deborah og Anna María áttu saman áhugavert síðdegi sumarið 2011.  Deborah  heimsótti vefstofu Önnu Maríu sem  sagði henni frá hugmyndum sínum um sýningu á tuskuteppum með vísun í bómullariðnaðinn í heild.  Þær ræddu saman um bómull, iðnað, ræktun , mengun og sjálfbærni og komust að því að þær voru mjög líkt þenkjandi . Úr þessu varð samvinna þar sem Deborah skrifaði og Anna María óf.

„Endurvinnsla og endurgerð bómullarfata og efna eru skapandi leið til að minnka þörf á nýjum bómullarvörum.

Bómull er ræktuð um allan heim í dag.  Stundum er bómull frá ákveðnum héruðum þekkt fyrir fegurð og gæði.  „Sea Island“ bómull ræktuð á eyjum fyrir utan strendur Suður Karólínu og Georgíu í Bandaríknunum eru með trefjar sem mælast 3,5 cm eða lengri.  Þar sem band þeirra þarf ekki að vera jafn snúðhart og úr bómull almennt þá tekst þeim að framleiða sérstaklega slétt og glansandi efni.  Efni úr löngum bómullartrefjum telst vera munðarvara í greininni.

Eftir spuna er bómullarband ofið eða prjónað í efni sem svo eru lituð eða þrykkt.  Framleiðslan er unnin um allan heim, oft í iðnþróunarlöndum.  Einfaldur bolur getur verið framleiðsla verkafólks í mörgum löndum:  Bómullin er ræktuð, spunnin, ofin, sniðin og saumuð saman í flík.

Aðalheiður S. Eysteinsdóttir hefur opnað sýninguna " Á Bóndadag " í Listasafni Reykjanesbæjar.

Í sýningarskránni segir Aðalsteinn Ingólfsson m.a. : “ Í myndverkum  Aðalheiðar S. Eysteinsdóttur, á sér stað óvenjulegra stefnumót íslenskra og erlendra myndlistarhefða en við höfum áður séð.  Annars vegar eru verk hennar íslenskara en allt sem íslenskt er, sprottin beinustu leið upp úr margra alda gamalli tálgu-og tréskurðarhefð meðal þjóðarinnar, í bland við alþýðlega sagnalist af kynlegum kvistum eins og þeim sem birtast ljóslifandi í skáldsögum Jóns Thoroddsen. Á hinn bóginn sækir Aðalheiður vinnubrögð sín til myndlistarmanna beggja vegna  Atlantsála sem meðvitað og ómeðvitað ögruðu hámenningarlegum viðhorfum neysluþjóðfélagsins með endurvinnslu úrgangs af ýmsu tagi, upp í hugann koma Merz-hús dadaistans Kurts Schwitters, jafnvel einnig umhverfisverk einfaranna Fernands Cheval í Lyon og Simons Rodia í Los Angeles.“

Sýningin er liður í verkefninu Réttardagur- 50 sýninga röð og mun vera sú 34. í röðinni.  Stefnt er að því að setja upp 50 sýningar á tímabilinu júní 2008 til júní 2013 sem allar fjalla á einn eða annan hátt um sauðkindina og þá menningu sem skapast út frá henni.   Nú þegar hafa sýningarnar ratað í flesta landshluta auk Hollands, Þýskalands og Bretlands. Verkefnið vinnur Aðalheiður yfirleitt í samstarfi við heimamenn og aðra listamenn á hverjum stað fyrir sig. 

Að þessu sinni taka 11 listamenn auk Aðalheiðar, þátt í því að gera Þorrablótsstemmningu á Bóndaginn í Reykjanesbæ.  Gestalistamennirnir eru Arnar Ómarsson og Sean Millington sem gera rýmið fyrir viðburðinn, Guðbrandur Siglaugsson gerir textaverk, Gunnhildur Helgadóttir gerir borðbúnað, Jón Laxdal gerir fylgihluti, Nikolaj Lorentz Mentze gerir hljóðfæri og hljómsveitin Hjálmar verður með uppákomu við opnun.  

Listasafn Reykjanesbæjar er opið alla daga 12.00-17.00 og um helgar 13.00-17.00, aðgangur er ókeypis.  Sýningin stendur til 18. mars.